Mentras Buhi pa ka
Ayha ra nimo makita kung unsa ka importante ang kwarta kung walang-wala na ka. Ayha ra nimo mahibal-an ang kalami sa pagkaon kung wa na kay makaon. Ayha ra nimo matagaa'g bili ang tubig kung mawala ang agas. Sige ra ka'g yaw² kay dako ang bill sa kurente pero kung mag blackout laayon ka sa inyong balay.
Ayha ra nimo makita ang bili sa usa ka butang kung mawala na sa imo. Daghan kaayo ka'g nakab-ot nga wala nimo gitagaa'g bili kay para sa imo gamay ra ng butanga. Gi-take for granted nimo. Ayha ra nimo ma-miss imong partner kung magbulag na mo. Pero karong nag uban pa mo, sige ra mo'g away. Di ninyo ma-appreciate ang ilang presensiya. Sama sa mga batan-on nga mas giuna nila ang pagpabadlong sa ilang ginikanan. Moabot ang panahon nga mawala na ilang ginikanan, dira nila ma-realize kung unsa kadako ang nawala sa ilang kinabuhi. Ayha ra ta makakat-on og pasalamat kung wala na, kung ulahi na. Nakalimtan nato ang pagpasalamat kay dili pa ta kontento sa atong kinabuhi. Gusto nato og kalamboan, mga bahandi ug seguridad. Nakapokus ta sa mga butang nga wa pa sa ato. Wa nato pabilhi ang mga butang nga naa na sa atong kinabuhi.
Di pod nato ma-blame atong kaugalingon kay tawo ra man ta. Dali ra tang masumhan. Dili nato mapansin ang bili sa mga tawo o butang kay abi nato'g perming nindot ang dagan sa kinabuhi. Abi nato'g permi silang naa sa atong kiliran. Sa dihang makuha na nato ang mga butang nga atong gusto o gikinahanglan, ang bili pod nila magkagamay. Katong bag-o pa na imong cellphone, di ba grabe nimo kalipay? Di ka gusto magarasan? Katong bag-o pa mo gauyab, di ba sweet pa kaayo mo? Magpa-gwapo o magpa-gwapa jud mo ayha mo magkita, di' ba? Pero ang bili mokunhod samtang molabay ang panahon. Magbagulbol na ta kay di na mao ang atong naandan. Pero imo bang giisip nga what if magbulag na mo? What if mawala imong cellphone? Unsa kahay imong bation? Timan-i nga nagkinabuhi ta nga way garantiya kung kanus-a ta taman. Ang mga tawo sa imong kinabuhi ug ang mga butang nga imong gipanag-iya, pwedeng mawala sa imo'g pinakalit. Apil imong kinabuhi pwedeng mawala sa usa lang ka pagpamilok. Kung imo ning tagdon nga kamatuoran, mausab jud ang panglantaw nimo sa kinabuhi. Hunahunaa nga mubo ra kaayo ang kinabuhi. Kabalo ko nga kabalo ka nga di ta imortal. Pero nagtoo gihapon ka nga di mahurot imong ugma.
“ah di sa ko ni lihukon ron.”
“ugma ra na oi”
Sama sa akong giingon ganina nga mubo ra kaayo ang kinabuhi. Wa ta kabalo nga mokalit ra ta'g kamatay. Wa ta mo gihadlok. Gipagawas lang tika sa ilusyon. Kana imong punto nga gi-prove jud nimo sa ila, kana imong nindot nga trabaho, kana imong status sa kinabuhi, tanan nimong bahandi, none of these matters in the end, and you cannot take anything with you when you go through the exit door. Mao ng ipaubos imong pride. Higugmaa imong ginikanan. Igna imong mga anak kung unsa nimo sila kapalangga. Igna imong kapikas sa kinabuhi kung unsa nimo siya kamahal. Pabilhi ang nabilin nimong mga panahon kay dili na ni mobalik ug di na pod ka mobalik.
Comments
Post a Comment